78-азыдзыд сылгоймаг гæнæн ис æмæ уынджы аззайа. Дарчиты Иветæ ныртæккæ æфсæддон æмдзæрæны цæры. Фæлæ йæ фæнд кæнынц рацаразын. Зæронд ус катайы бацыд, йæ зæронды бонтæ цæмæ æрхаудысты, зæгъгæ. Кæдæм фæцæуа цæрæнбынат агурынмæ? Ацæргæ адæмы хæдзар «Узæлд»-ы йæ сæ бон райсын у, хъæугæ гæххæтытæ куы сымбырд кæна уæд. Фæлæ йæ рады лæууын хъæуы.
Хæдзары ног дзаумайæ ницы ис. Къуымы рагон хуыйæн машинæ лæууы. Тæрхæгыл цъæх-хъæхид дидинджытæ рæзынц. Кæд Дарчиты Иветæйæн йæ цæрæнуат къуындæг у, уæддæр райдзаст æмæ сыгъдæг. Фæлæ лæмбынæгдæр куы акæсай уæд фендзынæ уаты къултæ кæлæтдзаг кæй сты, уый. Хъуынайы бын фесты. Дон та ведраты къæридоры иннæ кæронæй хæссын хъæуы. Фæлæ сылгоймагæн тагъд рæстæджы ацы хæдзар дæр нал уыдзæн. Иветæ цы æфсæддон æмдзæрæны цæры, уый нал уыдзæн. 78 -аздзыд сылгоймаг уынджы аззайдзæн. Хъыгагæнын ын нæдæр цот ис, нæдæр хæстæджытæ.
Дарчиты Иветæ: «6 азы цæрын ацы æмдзæрæны. Уымæй размæ та адæмы фæтерты рахау-бахау кодтон. Уæд хуыйæгæй куыстон æмæ мæ бон фидын уыд. Ныр цæстæй æвзæр уынын. Æрмæст пенсийæ цæрын. 12 мин сомы исын».
Алцæуылдæр фæстауæрц кæнын, зæгъы æфсæрмы кæнгæйæ Иветæ. Мæхицæн мæ цæст æппындæр ницы уарзы. Бæргæ йæ фæнды асламæй фатер хаццоны райсын, фæлæ ахæм кæй ссардзæн, уый дызæрдыггаг у. Æмæ ахъуыды кæнгæйы, куыд ис 12 мин сомæй фæцæрæн æмæ ма цæрæнуатæн дæр фидын.
Дарчиты Иветæ: «Базæронд дæн æмæ мæ цард афтæ руайдзæн, уый æнхъæл никуы уыдтæн. Зындзинæдтыл ахуыр дæн. Афтид дон мын кæм уа ахæм фатеры дæр фæцæрин. Иунæг Хуыцау мæ кувын. Æххуыс дзы курын».
Дарчиты Иветæйæн баххуыс кæнæм зæгъгæ, бацыдыстæм социалон службæтæм. Уым нын куыд бамбарын кодтой, афтæмæй сылгоймагæн йæ бон у хъæугæ гæххæтытæ сымбырд кæнын æмæ рады слæууын, цæмæй йын республикон кары адæмы хæдзар «Узæлд»-ы цæрн уа. Фæлæ та ам дæр йæ хъуыддаг нæ сырæзти. «Узæлды» уæгъд бынæттæ нæй. Фæллой æмæ социалон рæзты министрадæй рады лæууы 20 адæймаджы. Фæллæ уæддæр рады слæууын хъæуы, гæнæн ис æмæ дзы бынат фæзына. Цас æнхъæлмæ кæсын хъæудзæн, уый бæрæг нæу.
Ацæргæ адæмы хæдзар «Узæлд»-ы разамонæг Хъæцмæзты Фатимæ: «Кары адæмы хæдзармæ сæ бон æрбацæуын у социалон æххуыс кæй хъæуы уыдон. Фæллойы министрады сын сæрмагонд гæххæт раттынц. Зæронд адæмимæ аныхас кæнæм. Хæдзарыл сын экскурси саразæм. Цы равдисæм æмæ цæмæй раппæлæм уый нын ис. Тнг хорз уавртæ нæм ис цæрынмæ».
Уый хорз, фæлæ æмдзæрæнæй сылгоймаджы цы бон рарвитдзысты, уый æрхæццæ кæны. Дарчиты Иветæ дæрддæр йæ зæронды бонтæ кæм æрвитдзæн уый бæрæг нæу.
