Сывæллæттæ цы бинонты ис, уыдонæн уæлæмхасæн æххуысы фарстатыл ныхас кодтой нæ республикæйы Парламенты советы радон æмбырды. Уыдис абон.
Бæлвырддæр дзургæйæ, мадæлты капиталы фæрæзтæ ныр бахардз кæнæн уыдзæн сывæллоны фæсарæнты сдзæбæх кæныныл. Уæлдайдæр, Уæрæсейы æмбæлгæ уавæртæ куы нæ разына уымæн, уæд. Уымæй дарддæр ма Советы уæнгтæ ныхас кодтой нозтджын кæнæ наркотикты азарæй бынтон йæхи бар чи нæу, уыдоны карздæрæй æфхæрыныл. Се `ппæты нæ. Ахæм уавæры ма, йемæ хæцæнгарз кæмæн ис, уыдоныл цæуы ныхас. Административон æгъдауæй ма `фхæрдзысты, уæййаг фæлхасадон продукцийы хæрзхъæддзинадмæ фаг æргом чи не здаха, уыдоны дæр.
Уæдæ Советы уæнгты архайджытæ нæ ферох кодтой гæртæмтты ныхмæ тохы къамис саразын дæр. Куыд кусдзæн, уыимæ æргомæй зонгæ кæныны фадат уыдзæн дзыллон хабархæссæг фæрæзты минæвæрттæн æмæ нæ республикæйы цæрджытæн дæр.
