Цырыхаты Михал. Советон ирон фысджыты ирд æвдисæн. Публицист, журналист, редактор. Уӕды дуджы кæмдæрид хъуыд литературон архайд, уым уыд йе ‘рмдзӕф дӕр. Йе ‘мдзæвгæты æмбырдгонд «Кæмтты рухс»-æй æвзарæм цалдæр дзырды.

Хъодзаты Æхсары æрæджы дæр ма ирон дзырдаивады цардæгас цæджындз схонæн уыд… Фӕлӕ кӕд æгъатыр рæстæг «уыд», зӕгъгӕ, бахахх кодта, уӕддӕр Æхсары фыстытыл йæ тых нæ цæуы. Равзæрстам поэты æмдзæвгæты æмбырдгонд «Исчи».

Дауыраты Дамиры публицистон уацмыстæ чысыл не сты, ирдæй æвдисынц авторы курдиат. Ацы рауагъдæн райстам йæ чиныг «Уыцы зондджын тугдзых» æмæ дзы иу къорд дзырды равзæрстам.

Джусойты Нафийы «Фыдæлты туг» авторы æнтыстджындæр куыстыты номхыгъды ис. Дзаджджын у цымыдисаг дзырдтæй. Иу-цалдӕр дзы æвзарæм.

Абон æвзарæм Хъазиты Мелитоны монографи Къостайы тыххæй. Иртасæг сæмбырд кодта, Хетæджы-фыртæн ирон адæм æмæ ирон поэттæ цы номарæн æмдзæвгæтæ æмæ зарджытæ ныффыстой, уыдон. Мах та дзы цымыдисаг дзырдтæ рацагуырдтам.

20-æм æнусы зынгæдæр ирон поэты ном уæларвон фарн рарæдзæгъта Джыккайты Шамилы уаз номыл. Æрмæст литературон курдиатыл нæ банцад хъуыддаг. Ӕмбæстаг, патриот, нацийы развæдгæрдæг — уыдæттæй басгуыхт Шамил. «Рарæдзæгъдын» цы у, уый базонынæн та бакӕс ацы рауагъдмӕ. Поэт ацы дзырдæй спайда кодта йæ «Саст дзæнгæрæджы».

Æвзарæм Валентин Катаевы хъуыстгонд уацау «Полчы хъæбул»-æй ист алыхуызон дзырдтæ. Тæлмацы автор Дзесты Куыдзæг.

Хъуыстгонд журналист, публицист æмæ иртасæг Цгъойты Хазби аивадон чингуытæ дæр дзæвгар бацæттæ кодта. Абон æвзарынæн райстон йæ радзырдты æмбырдгонд «Дæ зæрдæ де ’вдисæн», зæгъгæ. Фидæны та лæмбынæгдæр æркæсдзыстæм Хазбийы ахъаззаг мифологон бæрæгуат «Арвы дуар»-мæ.

Чиныг равгæнӕн ис электронон чиныгдон «Бæрзæфцæг»-æй: https://vk.cc/cd4KAq

*УАХЪÆЗ: «Уахъæз комы ’рдыгæй расиры…»

*ТÆЛЫ: «Исчи йыл тæлытæ бакодта, æви?»

*РÆСУГ: «Бæрцæй цалдæр бæласы зайы рæсуг æнæном суадоны алыварс»

*КÆЛÆХ: «Æвæдза, цард цæй бырынцъаг, цъæрæхснæг, кæлæх фæндаг у»

*КАЙЫН: «Кадæнхъæл йæ намыс кæд фæкайы, уый нал фæиртасы»

*ХÆРÆ: «Хъуыдытæ… хылдысты сæры магъзы, хæрæ мигъ сыл æрбадт»

*НОМХЫГЪД: «Номæвæрæн куывды мадмæ æрбахастой алыхуызон нæмтты стыр номхыгъд»

*ФÆЛТÆМÆН: «Æмæ уый фæлтæмæны фæрцы дардмæ тыргъы суыдта йæ хъæбулты»

Хъуыстгонд Дзасохты Музафер литературæмæ куыд дæсны у, уый иууылдæр зонæм. Суанг ма иронау сдзурын кодта англисаг фыссæг Памела Трэверсы «Мэри Поппинс»-ы дæр. Цы цымыдисаг дзырдтæй дзы спайда кодта, уыдон «Судзаг æвзаджы» сæрмагонд рауагъды.

Чиныг равгæнӕн ис электронон библиотекæ «Бæрзæфцæг»-æй ацы æрвитæнмӕ гæсгæ: https://vk.cc/ccgfCS

*ÆРМКЪУХ: «Урс æрмкъух кæуыл ис, йæ уыцы къухы амонæн æнгуылдзæй ацамонгæйæ»

*НЫЦЦАУАЗЫН: «Æз сæм рудзынгæй кæсгæйæ, мæстæй мæлин, уынджы змæлд кæй ныццауæзтой, уый тыххæй»

*УÆРÆХЧЪИЛ: «Йæ иу къухæй хæцыди йæ уæрæхчъил худыл»

*ГÆЗÆНХЪÆД: «Йæ хызыныл хæцыд, афтæмæй асины гæзæнхъæдыл абадт»

*ТУХГÆ: «Стæй дзы систа сапоны дынджыр джипп, духийы авг, тухгæ бандон»

*ÆВДИСÆН: «Фæлæ цы ’рцыди, уымæн уыдысты цардæгас æвдисæнтæ»

*ЦЪÆХСНАГ: «Уыцы рæстæг сын сæ зæрдиаг ныхас фескъуыдта мисс Ларкы цъæхснаг хъæлæс»

*АЗМÆЦ: «Азмæц! Зонды къуыбар! Мæ сызгъæрин!»

*ХАТГÆ: «Дыууæ фунты мын хатгæ абар — æппæты хуыздæр чи у, уыцы хатгæйæ»

Ирыстонæн авд уды ис. Уый зæгъынмæ хъавыд Хъодалаты Герсан йæ чиныг «Æвдудон» схонгæйæ. Æмдзæвгæты æмбырдгонд, зын замантæ афысгæйæ, йæ кæсæджы æнæ ныфс нæ уадзы. Исæм дзы къорд хъæугæ дзырды.