Республикон бюджеты æфтиæгты бæрц ацы аз 9 мæймæ у 35 млрд æмæ 107 млн сомы. Уый тыххæй фехъусын кодтой хицауады æмбырды.
Профилон министрады сæрдар Исахъты Олег куыд фæбæрæг кодта, афтæмæй, фаронимæ абаргæйæ, схызтысты хъалонты æмæ хъалонтӕй уӕгъд æфтиæгтæ дæр. Æдæппæтæй сæ бæрц у 11 миллиард сомæй фылдæр. Хардзгонд æхцайы фæрæзты бæрц та — 35,5 млрд соммæ ‘ввахс. Сæйраг къабæзтæ — æнæниздзинадхъахъхъæнынад, культурæ æмæ ахуырад.
4 млрд соммæ ‘ввахс фæфылдæр сты социалон фиддонтæ, пособитæ, уыимæ, социалон къабазы аккаг лæггæдтæ бацæттæ кæнынæн цы схардз кодтой, уыцы фæрæзтæ дæр. Æндæр регионы профессионалон ахуырад ацæуын, кæнæ сæрмагонд ахуырад райсын кæй фæнды, уыдон райсдзысты финансон æххуыс. Баххæст сын кæндзысты фæндаггаг æмæ, цæрæнбынатæн цы схардз кæной, уый. Компенсацийæ спайда кæнын йæ бон уыдзæн, æгуыст чи у, уыдонӕн. Уыимæ æнхъæлцау сылгоймæгтæ, пенсиисджытæ æмæ куыст ссарын кæй фæнды, уыдон.
Æркастысты инвалидтæн куысты бынæтты квотæты закъоныпроектмæ дæр. Афтæ, йе ‘нæниздзинад хъыгдæрд кæмæн у, ахæм цæрджыты бæрц уыдзæн, куыстуаты æдæппæтæй цал адæймаджы кусы, уыдонæн сæ 2-3%. Республикæйы куыстдæттыны комитеты сæрдар Платы Альбинæ фæнысан кодта, куыстмæ исыны фæтк кæй снысан кодта федералон хицауад. Уый хыгъд, ведомство бæстонæй йе ‘ргом аздахдзæн куыд æххæстгонд цæуынц, уымæ.
